ئەنجوومەنی ڕاژە لەبارەی دامەزراندنەوە داوایەک ئاراستەی سەرجەم وەزارەتەکان دەکات

ئاڤا نیوز 

 

ئەنجوومەنی ڕاژەی گشتیی حكومەتی هەرێمی كوردستان، سەبارەت بە پێویستییان بە ڕاژەی هەڵگرانی بڕوانامەی باڵا و سێ یەكەمەكان، نووسراوێک ئاراستەی سەرجەم وەزارەتەكان دەكات.

 

وێنە گەورەكە: لەسەر داواكاریی ئەنجوومەنی ڕاژەی فیدراڵی، ڕۆژی 21-07-2024، ئەنجوومەنی ڕاژەی گشتیی حكومەتی هەرێمی كوردستان، نووسراوێكی ئاراستەی سەرجەم وەزارەتەكان كردووە و داوای زانیاریی سەبارەت بە پێویستیی وەزارەتەكان بە ڕاژەی هەڵگرانی  بڕوانامەی باڵا و سێ یەكەمەكانی زانكۆكان بەپێی خشتەیەكی دیاریكراو دەكات، مەبەستەكە میلاكات و دامەزراندنە.

 

زانیاریی بەدەستهاتوو: بەپێی زانیارییەكان، ئەنجوومەنی ڕاژەی فیدراڵی بە نووسراوی 4089/162/50، لە ڕۆژی 10-07-2024، نووسراوێكی بە خشتەیەک ئاراستەی ئەنجوومەنی ڕاژەی گشتیی هەرێمی كوردستان كردووە و داوا دەكات پێویستیی سەرجەم دامودەزگاكانی حكومەت بە ڕاژەی هەڵگرانی بڕوانامەی باڵا و دەرچووانی سێ یەكەم بەپێی پلە و ناونیشانی وەزیفی بۆیان ڕەوانە بكرێت.

 

لێدوانی فەرمی: سەبارەت بە بابەتەكە ئاڤا نیوز، پەیوەندیی بە عەباس ئەكرەم، گوتەبێژی وەزارەتی خوێندنی باڵا و توێژینەوەی زانستییەوە كرد و پشتڕاستی كردەوە كە نووسراوەكە بۆ وەزارەتەكەی ئەوانیش نێردراوە، هاوكات ئاماژەی بە ئەوە دا كە بابەتەكە تایبەت نییە بە وەزارەتەكەیان بەڵكوو بۆ سەرجەم وەزارەتەكان نێردراوە.