ئەحمەد كیكی: مەترسیی داعش بۆ سەر پارێزگای نەینەوا جددییە

ئاڤا نیوز 

 

سەرۆكی فراكسیۆنی پارتی لە ئەنجوومەنی پارێزگای نەینەوا ئاشكرای دەكات كە مەترسیی چەكدارانی داعش بۆ سەر پارێزگاكە جددییە.

 

وێنە گەورەكە: سەدان چەكدار و ئەندامی ڕێكخراوی تیرۆریستیی داعش لە زیندانەكانی سووریا ئازاد كراون و مەترسییان هەیە كە بپەڕنەوە عێراق، بە پلەی یەكەم مەترسی لەسەر پارێزگای نەینەوایە و سوپا و هێزە ئەمنییەكانی عێراق كەوتوونەتە حاڵەتی ئامادەباشییەوە.

 

لێدوانی فەرمی: ئەحمەد كیكی، سەرۆكی فراكسیۆنی پارتی دیموكراتی كوردستان بە ئاڤا نیوزی گوت: هەسەدە لە سووریا نزیكەی دوو هەزار تیرۆریست و ئەندامی داعشی لە زیندانەكان ئازاد كردووە، هەرچەندە تاوەكو ئێستا نەهاتوونەتە نێو نەینەوا، بەڵام بەهۆی هەڵكەوتەی جوگرافییەوە مەترسیی گەورە لەسەر پارێزگای نەینەوایە و ئەوەی ئەو مەترسییە زیاتریش دەكات، بوونی شانەی نووستووی گرووپە توندڕەوەكان و داعشە لەنێو سەنتەری شاری مووسڵ.

 

زانیاریی زیاتر: دوێنێ بۆ هەمان بابەت، موحسین مەندەلاوی، سەرۆكی پەرلەمانی عێراق (بە وەكالەت) سەردانی مووسڵی كردووە و لەگەڵ بەرپرسانی ناوچەكە گفتوگۆی كردووە، هەروەها ئێستا هێزێكی زۆری سوپای عێراق لەسەر سنووری عێراق - سووریا جێگیركراون بۆ ڕێگریكردن لە هەر هێرشێكی داعش.

 

لەلایەكی دیكەوە: بەدر شەمەری، ئەندامی ئەنجوومەنی عەشایەری ڕۆژئاوای نەینەوا و سەرکردەی سەربازیی حەشدی عەشایەری ڕایگەیاند: 470 ئەندامی ڕێکخراوی داعش لەلایەن هێزەکانی هەسەدە ئازادکراون و دزەیان کردووەتە نێو خاکی عێراق.