لە دوو ڕۆژدا مووچەی فەرمانبەرانی مەدەنی دابەش دەکرێت

ئاڤا نیوز

بەپێی زانیارییەكانی ئاڤا نیوز، سبەی و دوو سبەی مووچەی سەرجەم وەزارەتەكان جگە لە هێزە ئەمنییەكان و پێشمەرگە بۆ مانگی شەش دابەش دەكرێت.

وێنە گەورەکە: ئەمڕۆ وەزارەتی دارایی و ئابووریی هەرێمی کوردستان ڕایگەیاند: بڕی 421 ملیار و 760 ملیۆن دیناری دیکە گەیشتووەتە دەستیان، وەک بەشێک لە شایستەی مووچەی مانگی حوزەیرانی فەرمانبەرانی شارستانی هەرێمی کوردستان. 

زانیاریی بەدەستهاتوو: سەرچاوەیەک لە وەزارەتی دارایی بە ئاڤا نیوزی گوت: جگە لە مووچەی هێزە ئەمنییەکان سبەی چوارشەممە 10-07-2024، دەست بە دابەشکردنی مووچەی مانگی حوزەیران دەکرێت و لەماوەی دوو ڕۆژدا هەموو شوێنەکان مووچەکانیان وەردەگرن.

زانیاریی زیاتر: دابەشکردنی مووچە بەپێی خشتەی مانگی ڕابردوو (مانگی ئایار) دەبێت، لە ماوەی دوو ڕۆژدا کۆتایی پێدێت.

ئەوەی پێویستە بیزانیت: ڕۆژی 04-07-2024، بەغدا بڕی 231 ملیار و 605 ملیۆن و 531 هەزار دینار وەک مووچەی مانگی حوزەیران ناردبوو، ئەمڕۆش بەشێکی دیکەی ئەو پارەیەی نارد، بەڵام تاوەکو ئێستا مووچەی هێزە ئەمنییەکان بۆ مانگی ئایار و حوزەیرانی نەناردووە.