ناوی ئەو حزب و لایەنانەی بۆ هەڵبژاردن خۆیان تۆمار کردووە

ئاڤا نیوز 

کۆمیسیۆنی باڵای هەڵبژاردنەکانی عێراق، ژمارەی ئەو حزب و لایەن و کەسانە ئاشکرا دەکات کە خواستی خۆیان بۆ بەشداریکردن لە هەڵبژاردنی شەشەمین خولی پەرلەمانی کوردستان نیشان داوە.

وێنە گەورەکە: تەنیا یەک ڕۆژ ماوە بۆ ئەوەی هاوپەیمانی و حیزب و لایەن و بەربژێرەکان لە کۆمیسیۆنی باڵای هەڵبژاردنەکانی عێراق ناوی خۆیان تۆمار بکەن، ئەمەش دوای ئەوەی کۆمیسیۆن وادەکەی لە 13-6ـەوە بۆ 24-6-2024 درێژ کردەوە.

لێدوانی فەرمی: جومانە غەلای، گوتەبێژی کۆمیسیۆنی باڵای سەربەخۆی هەڵبژاردنەکانی عێراق بە ئاڤا نیوزی ڕاگەیاند: تاوەکو ئەمڕۆ یەکشەممە 23-6-2024 چەندین حزب و لایەن و کەس خواستی خۆیان بۆ بەشداریکردن لە هەڵبژاردنی شەشەمین خولی پەرلەمانی کوردستان نیشان داوە.

زانیاریی زیاتر:

پارێزگای سلێمانی:

دوو حیزب، هەشت بەربژێری گشتی، پێنج بەربژێری تورکمان و بەربژێرێکی کریستیان خۆیان تۆمار کردووە، هیچ هاوپەیمانییەکیش تۆمار نەکراوە.

پارێزگای هەولێر:
دوو هاوپەیمانی، نۆ بەربژێری تورکمان، هەشت بەربژێری کریستیان، نۆ بەربژێری گشتی، حیزبەکان 10 بەربژێر و سێ حیزبی دیکە خۆیان تۆمار کردووە.

پارێزگای دهۆک:
تەنیا حیزبی بابلیۆن، چوار بەربژێری گشتی و چوار بەربژێری کریستیان خۆیان تۆمار کردووە، هیچ هاوپەیمانییەکیش تۆمار نەکراوە.