دادگەی فیدراڵی وەڵامی سکاڵایەک لەبارەی ناردنی مووچە بۆ هەرێمی کوردستان دەداتەوە

ئاڤا نیوز

 

دادگەی باڵای فیدراڵی عێراق سكاڵای پەرلەمانتارێکی عێراقی ڕەتکردەوە کە تایبەت بوو بە پرسی ناردنی مووچە بۆ هەرێمی کوردستان.

 

چیرۆکی سەرەکی: ئەمڕۆ دادگەی فیدراڵی بۆ تاوتوێکردنی دوو سکاڵای مسته‌فا سه‌نه‌د، ئەندامی ئەنجوومەنی نوێنەرانی عێراق کۆبووەوە، بەڵام ڕەتیکردوونەتەوە و دەڵێت، سیفه‌تی یاساییان تێدا نییه‌.

 

ڕاگەیێنراوی فەرمی: "له‌ سكاڵای یه‌كه‌مدا کە لەسەر سەرۆکوەزیرانی عێراق تۆمارکرابوو، داوای كردبوو بڕیارێکی ئه‌نجوومه‌نی وه‌زیرانی عێراق بۆ ناردنی 618 ملیار دینار بۆ هه‌رێمی كوردستان بە نادروست دابنرێت بەهۆی ئەوەی کە پێچه‌وانه‌ی یاسای بودجه‌یه‌".

 

زانیاریی زیاتر: سكاڵای دووه‌می ئەو پەرلەمانتارە، لەسەر وەزیری دارایی عێراق بوو کە داوای کردبوو دادگە ئەو وەزیرە پابه‌ند بكات به‌ جێبه‌جێكردنی یاسای بودجه‌ی گشتیی ساڵەکانی 2023، 2024 و 2025 به‌شێوه‌یه‌كی دروست، ئەگەرنا به‌پێچه‌وانه‌ی ده‌ستوور بناسێنرێت. 

 

ئەوەی پێویستە بیزانیت: مستەفا سەنەد، خۆی وەکو پەرلەمانتاری سەربەخۆ دەناسێنێت لە ئەنجوومەنی نوێنەرانی عێراق، بەڵام لە حەشدی شەعبییەوە نزیکە.