لەمەودوا عێراق بەیاسا ڕێگری لەپێشێلكردنی مافی دایک و باوک دەکات

ئاڤا نیوز

 

عێراق بەیاسا ڕێگری لە پێشلكردنی مافی دایک و باوک دەکات و هەرکەسێک بێڕێزی بکات سزادەدرێت، هەروەها سزادانی پەرلەمانتارانیش ڕێکدەخات. 

 

وێنە گەورەكە: پەرلەمانی عێراق دوو پرۆژە یاسای حكومەتی پەسەند كرد كە یەكێكیان تایبەتە بە پاراستنی مافی دایک و باوک لەلایەن كوڕ و كچ و نەوەكانیانەوە.

 

لێدوانی فەرمی: جاسم محەممەد خەفاجی، ئەندامی لیژنەی یاسایی پەرلەمانی عێراق ڕایگەیاند: یاسای سزادان كە حكومەت ڕەوانەی پەرلەمانی كردووە و پەسەند كراوە، دوو بڕگەی سەرەكی لەخۆ دەگرێت،  یەكێكیان لەبارەی ئازاردانی دایک و باوكە، هەر كەسێک بێڕێزی بە دایک و باوكی بكات یاخود ئازاریان بدات سزا دەدرێت، كە خۆی لەزیندانی و پێبژاردن دەبینێتەوە. 

 

لەلایەکی دیکەوە: بڕگەیەكی دیکەشیان پەیوەستە بە پارێزبەندی پەرلەمانتارەوە، جەختكرایەوە لەسەر ئەوەی كە لەدەستووردا باس كراوە، لەگەڵ زیادكردنی بڕگەیەكی یاسایی بەوەی لە دۆسییەكانی تاوان و سەرپێچی یاسایی پەرلەمانتار پارێزبەندی هەر دەمێنێت.

 

بۆچی گرنگە: لە یاساكەی پێشوودا، دەتوانرا پەرلەمانتار دەستگیر بكرێت و لێپرسینەوەی لەگەڵدا بكرێت، ئێستا پارێزبەندی بۆ زیادكراوە بۆ ئەوەی بتوانێت ڕۆڵی چاودێری خۆی بەباشی بگێڕێت و هەر سەرپێچیەكیشی كرد تەنیا بە ڕەزامەندی سەرۆكی پەرلەمان و جێگرەكانی دەستگیر دەكرێت.