پارتی و یەکێتی بۆ کۆبوونەوە چاوەڕوانی یەکتر دەکەن

ئاڤا نیوز

 

دوای یەکەمین کۆبوونەوەی نێوان پارتی و یەکێتی، ئێستا هەردوولا چاوەڕوانی یەکترن بۆ ئەوەی کۆببنەوە و گفتوگۆ لەبارەی پێکهێنانی حکومەت بکەن، ئەندامێکی مەکتەبی سیاسیی پارتی دەڵێت "چاوەڕوانی وەڵامی یەکێتین"، لەبەرامبەردا ئەندامێکی ئەنجوومەنی سەرکردایەتی یەکێتی نیشتمانی دەڵێت "تۆپەکە لە ساحەی پارتییە و بۆ دانیشتن چاوەڕوانی ئەوانین".

 

وێنە گەورەکە: ڕۆژی 30-11-2024، شاندی دانووستانکاری پارتی و یەکێتی لە دەباشان کۆبوونەوە، دوای کۆبوونەوەکە ڕایانگەیاند کە کۆبوونەوەکە لە کەشێکی ئەرێنی دا بەڕێوەچووە، هەروەها ئامادەیی خۆیان بۆ درێژەدان بە کۆبوونەوەکانی نێوانیان دەربڕی.

لێدوانی فەرمی: ئەندامێکی ئەنجوومەنی سەرکردایەتی یەکێتی، بە ئاڤا میدیای ڕاگەیاند: یەکێتی ئامادەیە بۆ دانیشتن، تۆپەکە لە ساحەی پارتییە و چاوەڕوانی ئەوانین.

 

بۆچوونی بەرامبەر: ئامینە زکری، ئەندامی مەکتەبی سیاسیی پارتی دیموکراتی کوردستان،  بە ئاڤا میدیای ڕاگەیاندبوو: بۆ کۆبوونەوە و دانوستاندن چاوەڕێی وەڵامی یەکێتین، جەخت لەسەر ئەوە دەکەینەوە کە بنەمای پێکهێنانی حکومەت ئەنجامی هەڵبژاردن بێت.