وەزیریرێکی لوبنان: حەسەن نەسروڵڵا پێش کوژرانی بە ئاگربەست ڕازی ببوو

ئاڤا نیوز

 

وەزیری دەرەوەی لوبنان ئاشکرای دەکات، چەند ڕۆژێک بەر لە کوشتنی حەسەن نەسروڵڵا، بە ڕاوێژ لەگەڵ حیزبوڵڵا ڕازی ببوون بۆ ئاگربەست لەگەڵ ئیسرائیل و لەمبارەیەوە گفتوگۆ کرابوو.

 

ڕاگەیێنراوی فەرمی: عەبدوڵڵا بوهابیب، وەزیری دەرەوەی لوبنان ڕایگەیاند: بە ئاگاداریی ئەمریکییەکان، حەسەن نەسروڵڵا، ئەمینداری گشتیی حیزبوڵڵای لوبنان، 21 ڕۆژ پێش کوژرانی ڕازی بوو بە ئاگربەست لەگەڵ ئیسرائیل.

 

زانیاریی زیاتر: بەگوتەی عەبدوڵڵا بوهابیب، ''دەگوترا بنیامین نەتانیاهۆ، سەرۆکوەزیرانی ئیسرائیل بەم هەنگاوە ڕازی بووە، بۆیە ئێمە ڕەزامەندی حیزبوڵڵاشمان وەرگرتبوو، بڕیاریش بوو چەند ڕاوێژکارێک لە کۆشکی سپی سەردانی لوبنان بکەن بۆ دانوستان لەبارەی ئاگربەستەکە". 

 

ئەوەی پێویستە بیزانیت: لە 26-09-2024، بەیاننامەیەکی هاوبەش لەلایەن ئەمریکا، فەرەنسا، سعوودیە، ئیمارات، قەتەر و چەند وڵاتێکی دیکە بڵاوکرایەوە، تێیدا داوای ئاگربەستی 21 ڕۆژەیان کردبوو بۆ دوورکەوتنەوە لە پەرەسەندنی زیاتری شەڕەکە. 

 

باکگراوند: ئێوارەی ڕۆژی هەینی 27-9-2024، سوپای ئێسرائیل بە هێرشی ئاسمانی حەسەن نەسروڵڵای لەنێو باڵەخانەیەک لە باشووری بەیرووت کردە ئامانج.